Қадрли китобхон, илмий қомуслар яратиш борасидаги халқаро ва миллий тажрибани, бугунги замон талабларини ҳисобга олган ҳолда тайёрланган, икки китобдан иборат ушбу мажмуа жаҳон фалсафаси тарихи, унинг тадрижий тараққиёт босқичлари, асосий оқим ва йўналишлари, буюк донишманд мутафаккирларнинг ҳаёти ва ижоди, машҳур фалсафий асарлар ҳақидаги мухтасар мақолалар, бу соҳа билан боғлиқ қонун ва категориялар, тушунча ва атамаларнинг қисқача изоҳларидан иборат. Истиқлол йилларида юртимизда илм-фан ривожи, жумладан, фалсафий тадқиқотлар самарасини ошириш йўлида яратилаётган имкониятларнинг яна бир амалий натижаси бўлган мазкур китобни бу борадаги ўзига хос янгилик, кўп йиллик меҳнат маҳсули сифатида қабул қилишингизни сўраймиз. Айни пайтда у ғоят мураккаб кенг кўламли иш бўлган Жаҳон фалсафаси қомусини яратиш йўлидаги илк тажрибадир. Жаҳон фалсафаси бўйича йирик қомуслардан бири, Ўрта Осиё мамлакатларида илк тажриба бўлган, 4000 дан ортиқ мақола ва изоҳлар жамланган ушбу асар «Жаҳон ва Ўзбекистон ижтимоий тафаккури ривожини таҳлил қилиш натижасида «Фалсафа қомуси»ни яратиш» мавзусидаги ИФ 1-093 фундаментал ҳамда «Ўзбекистон фалсафаси тарихининг 3 жилдини яратиш ва чоп этиш» мавзусидаги ПЗ-20170930386 амалий тадқиқот лойиҳалари асосида тайёрланди.